“အွန်လိုင်းရှော့ပင်းများကို မှတ်ပုံတင်ရရှိပြီးမှသာ လုပ်ကိုင်ခွင့်ပြုမည်ဟု စီးပွား/ကူးသန်း အမိန့်ထုတ်ပြန်”

မည်သူမဆို Online စနစ်ဖြင့် ရောင်းချခြင်းလုပ်ငန်းကို မှတ်ပုံတင်လက်မှတ်ရရှိပြီးမှသာ လုပ်ကိုင်ခွင့်ပြုတော့မည်ဖြစ်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနက ယနေ့ (ဇူလိုင် ၂၁ ရက်) တွင် အမိန့်ကြော်ငြာစာအမှတ် ၅၀/ ၂၀၂၃ ဖြင့် ထုတ်ပြန်ထားသည်။

စီးပွားရေးနှင့် ကူးသန်းရောင်းဝယ်ရေးဝန်ကြီးဌာနအနေဖြင့် အရေးကြီးကုန်စည်နှင့် ဝန်ဆောင်မှုဥပဒေပုဒ်မ ၄၊ ပုဒ်မခွဲ (ဂ) အရ အွန်လိုင်းစနစ်ဖြင့် ရောင်းချခြင်းလုပ်ငန်းကို အရေးကြီးဝန်ဆောင်မှုလုပ်ငန်းအဖြစ် သတ်မှတ်လိုက်ကြောင်း ယင်းအမိန့်စာတွင် ဖော်ပြထားသည်။

ထို့ပြင် အဆိုပါအမိန့်ကြော်ငြာစာကို ထုတ်ပြန်ပြီး ခြောက်လပြည့်မြောက်သည့် နေ့ရက်မှ စတင်၍ မှတ်ပုံတင်လက်မှတ်မရှိဘဲ အွန်လိုင်းစနစ်ဖြင့် ရောင်းချခြင်းလုပ်ငန်းကို လုပ်ကိုင်ဆောင်ရွက်ကြောင်း တွေ့ရှိပါက အရေးကြီးကုန်စည်နှင့် ဝန်ဆောင်မှုဥပဒေ ပုဒ်မ ၅ အရ အရေးယူခြင်းခံရမည်ဖြစ်ကြောင်းလည်း အမိန့်ကြော်ငြာစာ၌ ထည့်သွင်းဖော်ပြထားသည်။

#mhtnews